背包客棧自助旅行論壇
[南亞旅遊好文]又是每年一度的小連旅行大遊記,2012年我與食家出發的目的地是尼泊爾﹗出發日期係16/6/12 - 23/6/12,睇日期就好似8日7...alllin 食店地址資料: 我的飲食微博: 我的無朋友Google+ : smallsmallsmalllin@gmail.com
訂房比價
回覆   發表新主題
smallsmalllin 的頭像
smallsmalllin smallsmalllin 目前離線
客棧之光
#1
文章: 612
性別: 男生
感謝: 222次/64篇
註冊日期: 2009-01-16
舊 尼泊爾八日七夜登山體驗之旅 - 2012-08-13, 11:02
又是每年一度的小連旅行大遊記,2012年我與食家出發的目的地是尼泊爾﹗

出發日期係16/6/12 - 23/6/12,睇日期就好似8日7夜,但由於夜機去早機返,老老實實只係得6日全天遊玩﹗

在尼泊爾逗留的地點為首都加德滿都、樸卡拉及哲雲,我會在遊記中多加旅程中每事的價錢,希望可以幫到之後會去尼泊爾既朋友作參考。



苦等一年,又係出發的日子,上年的土耳其之旅由於遇到極多好人好事,故常在腦海中回味﹗

去尼泊爾都幾多航空公司可選擇,格價之後以直航機來計,都係搵番尼泊爾航空最划算,在學聯旅遊訂直航機票連稅連兩晚加德滿都酒店$5100有找﹗
相比起其他國泰、港龍等航空公司,計埋稅可以平成$2000左右呢﹗老虎蟹都揀啦﹗

尼泊爾航空平就平,不過缺點係晚機去,早機返,變相無咗兩日假﹗



5:05pm出發,網上講尼泊爾做野好慢好咪嚤,交通工具常有延誤的情況,今次一搭飛機就遇到喇﹗結果係5:30pm都仲俾人上機,6:00pm先正式起飛,奇中奇﹗

飛行時間約4.5小時,要讚佢個飛機餐都幾好味喎,我地兩個人食鬼哂﹗
未食飯梗係飲番杯先啦,一紅一白酒,飲勝,祝旅行順利﹗

今次去尼泊爾其實都諗左幾耐,原因係之前三個星期因政治問題尼泊爾大罷工,連學聯都唔敢同我地出票,成個package是最後一個星期才取到的,勁唔勁?



網上流傳話尼泊爾過關要俾黑錢Tips,我而家同你講我這次旅程來回也很順利,沒有遇到收錢情況﹔海關慢就係慢點,但都有禮貌同你say Hello,還算友善呢﹗

尼泊爾慢香港2小時15分鐘,最後出關時間係尼國時間8:00pm左右﹗
出關容易,可惜的是等行李極慢,成20分鐘都仲未有行李從輸送帶傳出來﹗



好不容易步出機場,見到有兌換店就兌番少少尼泊爾盧比洗住先。
我地老早就兌左美金,美金兌換係87.1,兌番港紙就當佢除10吧﹗容易記﹗
(機場不宜兌錢,因收手續費,兌小小搭車好了)



要離開尼泊爾機場去酒店最有效的方法係搭的士,你一出門口就會見到過百個的士司機在路上圍上來向你拉生意酒店接送,場面浩大。
其實可以直接行埋去同是旦一個的士司機傾價錢講價,但我地由於初到貴境又夜,做咗最蠢的決定係去旁邊的小店去搵Pre-Paid Taxi﹗

講價其實可以300Rs 搞掂,我地免麻煩就650Rs,貴咗一倍啊,不過諗深一層其實都係$30同$65既分別,無咩所謂吧﹗聽朝再慢慢殺價吧﹗



酒店在加德滿都最出名的市中心Thamel,的士20分鐘就到達喇﹗
絕大部份來遊加德滿都的遊客也是住在這兒﹗

酒店是Hotel Marshyangdi!
地點在最旺的Thamel街北段背面,正宗可以叫做旺中帶靜,行兩分鐘就到Thamel街﹗
屬三星級酒店,勝在簡簡單單清潔衛生有冷氣,在尼國唔可以用星級來形容酒店,其實乾淨衛生已算不錯﹗如果想睇多尐有關酒店的Comment,可以去Tripadvicor搜尋一吓。

尼泊爾由於供電不夠,所有地方無論酒店食店都會有停電的問題出現,這酒店還好,有張Notice話你聽幾時幾分會停電,好過你瞓瞓吓無冷氣,情況容後再談﹗

Checkin已是9:30pm,咁啱星期六10:00pm前無電,放低野快快出去開餐了﹗



雖已入夜,不過Thamel依然人聲鼎沸,遊客絡繹不絕﹗

由於未熟地頭,我們只是出酒店轉右手面向Thamel直路行一陣,不敢去得太遠﹗
9:30pm晚街頭都仲有好多商店未關,特別是精品店、手信鋪、行山用品等,連兌換店都未關﹗



向右行入Thamel街,見到間叫NFC既露天既餐廳播住歌人又多好似好有氣氛咁,就入去試吓﹗



餐廳全露天,昏暗的燈光加上每枱上點著的洋燭,感覺浪漫有情調﹗



當晚絕大部份都係尼泊爾人,感覺地道﹗



在尼泊爾餐廳,九成九遊客區的都係食西餐﹗而佢地既營業時間大約去到10:00pm左右﹗
本來想吃Pizza,點知大廚已收工,故只點了意粉及薯條,味道也不錯呢﹗

身為酗酒人士當然唔會唔介紹當地啤酒,Everest在當地屬最廉價啤酒之一,一般餐廳每支約250-300Rs ($25-$30)左右,士多買最平試過150Rs($15),比起香港啤酒價錢不便宜呢﹗
只有大啤供應,岩哂我呢尐由朝飲到晚的人﹗


原文載於: 背包客棧自助旅行論壇 https://www.backpackers.com.tw/forum/showthread.php?t=721102

要提提來尼國的朋友,尼泊爾旺如Thamel也沒有街燈的,故晚間外出,如所有食店精品店關門,全街便漆黑一片,伸手不見五指﹗
好在我老早有準備,在淘寶買了強力小電筒,照住條街無有怕,感覺雖有如探險,但挺過癮的﹗

吃完飯的目的地是在酒店右手邊一條街的Sam's Pub﹗一場來到唔係瞓覺嘛?
梗係出去浦啦﹗



10:30pm來到,都不知幾旺,全場都係外國遊客,呢間酒吧原來已經有十年歷史呢﹗




店長是澳洲藉女子,來尼泊爾十多年了,為人健談,也許不太多香港來的朋友,每次當我地話自己係香港人的時候,佢地都會滿有興趣的﹗
又係Everest Beer啦﹗酒吧消費300Rs($30)﹗

平日去旅行,通常晚晚出親去都飲到斷哂片先返酒店。
但由於這兒街道無街燈,令我地呢兩個人痴線人都唔敢太放肆,故我都飲多三支大啤就返酒店沖涼瞓覺喇﹗

明天12:30pm會搭內陸機到樸卡拉呢﹗這就是我們精彩尼泊爾體驗之旅的第一天﹗

我的網址: http://hk.myblog.yahoo.com/smallsmallsmalllin
Facebook齊齊飲飲食食: facebook.com/smallsmalllin
食店地址資料: http://smallsmalllin.openrice.com/
原文載於: 背包客棧自助旅行論壇 https://www.backpackers.com.tw/forum/showthread.php?t=721102
我的飲食微博: http://t.sina.com.cn/smallsmalllin
我的無朋友Google+ : smallsmallsmalllin@gmail.com
15 被閱讀18840次
回覆時引用此篇文章
smallsmalllin 的頭像
smallsmalllin smallsmalllin 目前離線
客棧之光
#2
文章: 612
性別: 男生
感謝: 222次/64篇
註冊日期: 2009-01-16
舊 回覆: 2012尼泊爾八日七夜登山體驗之旅 - 2012-08-13, 11:03


酒店全晚沒有斷電,睡得難得的好,不過6:00am開始有雞啼,7:00am就起身喇﹗

今次能在尼泊爾要多謝在網上認識到的台灣人Ruby,她出版的「尼泊爾 玩全秘笈」相當有用。

由於訪間尼泊爾自由行資料不多,香港更無出過任何一本有關尼泊爾旅遊書,故買了台灣人Ruby出版的自由行書作參考,而在plan行程的同時亦會在網上向Ruby發問,每次她均用心解答,多謝哂你,在此向你致敬﹗



見網上好多朋友都會問到在尼泊爾應用什麼轉插頭,影埋俾你地睇,就係呢隻兩腳圓插,所有酒店也適用﹗



Hotel Marshyangdi 的餐廳在大堂左面,環境不錯,可惜的是尋晚下完雨,坐唔到露天位﹗

這間酒店要彈既係用wifi竟然要俾錢,我在尼泊爾各酒店全部都係免費房內wifi的,這間太不近人情了﹗



食物方面很豐富,包你可以吃到飽,另有廚師即煎奄列供應,幾好味呢﹗



天光光,影番張酒店相先﹗

由於今朝12:30pm先到機場搭內陸機到樸卡拉,故仲有時四圍行,由於無咩地方想去,今早既行程係在Thamel附近隨意走走﹗
原文載於: 背包客棧自助旅行論壇 https://www.backpackers.com.tw/forum/showthread.php?t=721102#post4284840



三軍未動糧草先行,當然兌左錢先啦﹗

就在酒店門口已有兌換店,1US 兌 88.5 Rs,不收手續費的﹗

Thamel成條街都係兌錢店,就我所見都唔洗點格價,間間個價位都係差唔多,是旦找間兌便可以了﹗



8:30am的Thamel,商店都慢慢開鋪,不少當地人見到我地都會笑笑地說:

"Namaste"
(即係"你好"咁解,去尼泊爾一日講幾百次﹗禮多人不怪﹗)

要談談尼泊爾的街道馬路﹗基本上只有很少地方已鋪好柏油路﹗
大部份都是爛泥路,高低不平,下雨更出現大量水窪,反之天氣熱的時候,汽車經過卻會泛起大量灰塵。

加德滿都人多車多,空氣污染極高,行個幾鐘已感到雙眼很乾喉也喝,不少當地人上街都會戴上口罩自保﹗



尼泊爾80%人口都督信印度教,故街道上常見寺廟﹗
大家看到嗎?我所有在加德滿都影的相個天都係灰色的........



橫街窄巷不少建築都很古色古香,可能不太多亞洲人到尼泊爾,故我地兩個一路行一路影成為咗一對行動中的肥怪獸﹗大家對我地很有興趣﹗



呢間藥房,不知已有多少年歷史呢?



行到舊區街市,見到有一檔在整炸物,我怕肚痾唔敢試﹗
不過婦人坐在石油氣上十分有型﹗



街市咩都有得賣,9:00am已迫滿居民。
想說這兒的衛生意識未太普及,男人總是愛隨地吐痰,而就所見街市內垃圾是掉在地上的,一大堆又一大堆,故烏蠅常到處飛舞,鋪頭都愛將垃圾拋出門外﹗
街市的情況更甚,行這個舊區街市要有少少心理準備,有烏黑老鼠在我腳下走過﹗
原文載於: 背包客棧自助旅行論壇 https://www.backpackers.com.tw/forum/showthread.php?t=721102#post4284840



一路亂行左穿右插行左個幾鐘,最後行咗唔知去邊,當然最好方法係打的回府,第一次在尼泊爾講價喇﹗等我分享一吓講價攻略啦﹗

路程其實只係轉幾個彎,佢開200Rs($20),我殺100Rs,佢係都要話180Rs、再150Rs、再130Rs,之後我掉轉頭扮想搵第二架,佢就話:"one hundred﹗ OKOK!!"

呢招在深圳大陸可能已行不通,但在尼泊爾殺價是十試九靈﹗



見仲有時間,當然再去食下野啦﹗

來了這間在酒店右轉行一條街的Forever Cafe,貪佢有免費wifi,而且環境也不錯呢﹗

附件 606691

尼泊爾必吃的食物,叫MOMO,蒸的餃子,料是雞肉,有如香港的小籠包﹗

價錢是180Rs($18),皮搓得煙韌,餡料多汁,加入了印度香料,是一番新感受,好味的﹗

附件 606690

再必談的是我倆每天必飲的尼泊爾奶茶,這奶茶特別之處是用新鮮水牛奶直接煮滾,放入茶包便成,完全無加水,故奶味極濃,又香又滑﹗

平日對牛奶反感的我,每日都飲番三兩杯,真的又滑又香,如找到不用茶包直接煮茶葉的更正,記住要試﹗一百分﹗

食完MoMo再飲番杯奶茶就返酒店執野出發去機場喇,這是在加德滿都的一天﹗(待續....)

又分享少少感受,我地兩個每年也去一次旅行,就以往經驗如韓國、越南、土耳其等,當地的首都雖有特色但總覺太商業不夠深度。
故今次尼泊爾我地醒目只係頭尾半天在首都加德滿都,事實證明我地亦無揀錯,在其他地方真的有更多體驗及更能體現尼泊爾的美。


我的網址: http://hk.myblog.yahoo.com/smallsmallsmalllin
Facebook齊齊飲飲食食: facebook.com/smallsmalllin
我的美食地圖: http://smallsmalllin.openrice.com/
我的飲食微博: http://t.sina.com.cn/smallsmalllin
4
回覆時引用此篇文章
smallsmalllin 的頭像
smallsmalllin smallsmalllin 目前離線
客棧之光
#3
文章: 612
性別: 男生
感謝: 222次/64篇
註冊日期: 2009-01-16
舊 回覆: 2012尼泊爾八日七夜登山體驗之旅 - 2012-08-13, 11:03
話咁快又要出發喇,回酒店收拾完行李之後,就打的去機場,搭飛機到樸卡拉﹗

去樸卡拉其實可以經陸路,問過就20USD一程,時間係8小時左右﹗
揀飛機既原因當然係舒適同慳時間啦,只係20分鐘就到﹗

我哋由於已Book樸卡拉的酒店,酒店話可幫我地代訂機票65USD一位(原價100USD),見既然平咗就選左飛機喇﹗




機場分為International同埋Domestic,內陸機就當然係Domestic啦﹗
機場個樣又殘又舊,真係唔講都唔知原來係一個機場來的﹗

前文講過我地初到貴境搭的士由機場去酒店650Rs($65),今次我地講價300Rs($30)搞掂﹗



入到去人頭湧湧,充滿懷舊氣息,有點似睇電視那些六十年代火車站﹗
記住係無冷氣的,風扇都無把﹗



用來量度行李重量的磅,夠哂有趣﹗
聽說現在絕大部份國家都已轉用電子磅,係尼泊爾內陸機場未轉吧﹗



提提有興趣來的老友記,來到這兒要先去交200Rs人頭的機場稅,入到機場一望就知好易搵到﹗

另外在進入機場時,會有幾個阿叔帶住職員證好有禮貌又殷勤地幫你拎行李,帶你交機場稅,又帶你去櫃檯換機票﹗
千萬別以為佢地係機場人員,他們只是來搵貼士的,我地就中咗招,最後諗住是旦俾100Rs($10)佢就算,點知佢竟然黑面,又話兩個人每人要100Rs先岩,是鬼旦都廢事同佢講咁耐﹗我就唔建議俾喇,不過人地幫咗我地就算了吧﹗所以提提大家要小心﹗

仲有一樣野係火機不能帶上機,我的被沒收了﹗



尼泊爾內陸機最出名一樣嘢就係延誤,我哋兩個12:30pm機,諗住11:00pm到機場,點知原來過關加交稅都唔洗5分鐘﹗早知12:00nn先到都仲得,一早來悶到嘔架﹗
再加上延誤,最後1:30pm飛機先到﹗慘慘慘﹗

在機場坐在發霉呀﹗終於可以上機,要先坐小巴到飛機旁﹗



呢架就係內陸機喇﹗Yeti Airline,佢地好似每天都有八班飛機飛樸卡拉呢﹗



上咗飛機感覺有如搭小巴一樣,20多個座位左右﹗



飛機起飛前空姐會派發糖果、汽水、花生及棉花當耳塞,不過講真飛機也不是太嘈。
20分鐘就到達樸卡拉了,搭飛機係貴點但咁快就到你會覺得值得的﹗


原文載於: 背包客棧自助旅行論壇 https://www.backpackers.com.tw/forum/showthread.php?t=721102#post4284844

一落機就見到Pokhara地圖,如有朋友有興趣要高清版的話,不坊在我的Yahoo網誌回覆留Email吧﹗



樸卡拉的機場又是古色古香,一出機場自然有的士司機撩你到湖邊的酒店區,聽說公價是大約200Rs左右﹗

我們的酒店很體貼,有員工在機場外接送﹗




15分鐘就到酒店喇,酒店是Hotel Splendid View。
從地圖看是在Fewa Lake Lakeside的下方,環境清靜,房間新淨,衛生無問題,有冷氣,不過最重要係....



佢所有房間都有露台,如果天晴是可看到喜馬拉亞山雪山群的啊,可惜六月天氣麻麻我地看不到﹗
在網上預訂只係33USD一晚﹗極抵﹗



放下行李,我哋就落樓搵經理先生Raj,因要預訂這幾天的活動﹗
Pokhara最出名當然是行山,有一兩天的行程,也有一個月的行程,我們在這兒待上三天,當然要試試﹗

最後我哋揀咗以下活動(以人頭計):
1. 兩日一夜Dhumpus行山睇日出 USD 80(包導遊、飲食、酒店)
2. 半小時滑翔降傘 USD 70
3. 乘Greenline巴士到哲雲 USD 15

再找埋房錢及由加德滿都來這兒的機票錢,你沒有聽錯,這酒店是挺有誠意的,在香港在完全沒有收錢的情況下電郵機票給我﹔聽說來Pokhara的話,酒店不貴,賺錢是透過推介當地活動。

最後加加埋埋Raj是旦打個折頭,總之就500USD埋單﹗
價錢與之前在網上找資料差不多,故都懶得再出去格價,殺佢﹗



傾完活動,經理本來推介樸卡拉半天遊,但我哋一向對所謂景點零興趣,故自己行出Lakeside遊遊﹗
由酒店行出Lakeside馬路只要1分鐘吧,相當方便﹗

不過又係嗰句,入夜係無街燈的,記住帶電筒呀,唔係跌左落湖無人幫到你﹗

Lakeside大部份是賣手信的鋪頭、士多及食店。亦有很多行山用品店,入去逛逛,絕大部份是Northface用品,真定假就唔洗講啦,不過手工也不錯呢﹗

就與加德滿都相比,樸卡拉的商店沒有太多叫賣聲,你有興趣自己問老闆,不會太商業的拉客,純樸恬靜不少﹗



尼泊爾信奉牛係神,所以任由牛牛周街走,反而人車要為佢地讓路,過癮﹗


原文載於: 背包客棧自助旅行論壇 https://www.backpackers.com.tw/forum/showthread.php?t=721102#post4284844

成3:00pm午餐都未食,梗係醫醫肚餓,在大街見到有間叫Monsoon的,向海又好似有裝修咁,入去試試先﹗



在門外見到有簡體字,是我愛尼泊爾小飛,肉麻當有趣吧﹗
中國人在尼泊爾做生意的宣傳﹗



坐在窗邊的位置,望出去是草園及Fewa Lake,幾好風光呢﹗



店內環境也不錯,簡簡單單坐得舒服,晚上是Disco加酒吧﹗



尼泊爾另一Local啤酒,Gorkha Beer,同Everest的價錢差不多﹗
250Rs ($25)﹗細問當地人,佢地話佢地鍾意Gorkha Beer多一點,夠酒味咁話﹗



即叫即焗的Pizza,芝士下得多,批邊香脆熱辣辣,極美味。Rs 400 ($40)
我發現在尼泊爾不同地方所做出來的Pizza都十分美味,好過食意粉多多聲﹗



吃完Pizza出再在Lake Side走走,行到湖邊看風景,可惜的是天公不造美,常常陰天﹗

想談談天氣,時值六月中旬,Pokhara由於在湖邊會比較涼快,約26度左右吧﹗
反觀加德滿都空氣污染嚴重,走在路上總是覺得焗焗悶悶的,比較辛苦﹗




湖邊有小艇出租可以泛舟湖上,我地就無咩興趣了,都是看看便夠﹗



差不多天黑,拍多個照先﹗拍完個照回家瞓晏覺﹗



訓醒已是九點半,今晚沒有活動因明早睇日出4:30am集合﹗
所以就在酒店樓下的餐廳吃飯,這間Black & White,在網上的評語不錯的呢﹗



簡約的裝潢,食物亦不錯貴,點了意粉、湯及尼泊爾套餐﹗



蘑菇湯配蒜蓉包,湯自家煮濃稠料多,味道很好﹗



這是我唯一一餐尼泊爾菜,這道叫Dal Bhat,手抓飯,即係尼泊爾全餐,當地人會以手進食的﹗
中間是白飯,配有綠豆湯、烤餅、雞咖哩、酸乳酪及雜菜等﹗

老實說不太合口味,配菜都在因下了香料已極濃味,咖哩不辣,只可說普普通通,故及後幾天也沒有再試了﹗

明天4:30am要在大堂集合到Sarangkot看日出及開始八小時的行山活動,還是乖乖早早回家安睡了﹗


我的網址: http://hk.myblog.yahoo.com/smallsmallsmalllin
Facebook齊齊飲飲食食: facebook.com/smallsmalllin
我的美食地圖: http://smallsmalllin.openrice.com/
我的飲食微博: http://t.sina.com.cn/smallsmalllin
此篇文章於 2012-08-15 16:40 被 小眼睛先生 編輯。
4
回覆時引用此篇文章
smallsmalllin 的頭像
smallsmalllin smallsmalllin 目前離線
客棧之光
#4
文章: 612
性別: 男生
感謝: 222次/64篇
註冊日期: 2009-01-16
舊 回覆: 2012尼泊爾八日七夜登山體驗之旅 - 2012-08-13, 11:04
話咁快就第三天,酒店睡得不錯,冷氣足,可惜今天要早起,未能一睡到天明﹗

4:00am就收到Morning Call,今天活動是到Sarangkot看日出,之後行八小時山到Dhampus﹗



乘私家車到達Sarangkot已是5:00am,個天才剛亮呢﹗

咁早起身就當然希望有嘢睇,但世事總是弄人,大家睇個地下已知尋晚下大雨了﹗



雲霧一層又一層的,天色亦灰暗,點會看到日出?



雖然無咩好睇,但山上尚算好風光,可以遠眺Fewa Lake﹗



雲極厚,但偶有機會也會看到遠處的喜瑪拉雅雪山群﹗



就係咁等等等影影影,已經6:00am喇,天色開始明亮,好明顯日出已過﹗



一大班上來睇日出的朋友,都應失望而回吧﹗



這位就是我倆的這兩天的導遊,Mr. Happy﹗全團得我哋兩個人﹗哈﹗
就係佢在這兩天陪我哋行山喇﹗之後再為佢作介紹﹗



題為尋找魚尾峰之旅,只要一見到雪山群中最突出的魚尾峰,導遊都必然叫我地快看快影相﹗

可惜時間不多,現身一陣又會消失了﹗



由於昨晚下大雨關係,天上出現彩虹﹗
導遊話再行上一點,風景會更好﹗



一路上其實都幾多酒店,全部都是向山群的,風景十分好,可惜如果要住的話有排行﹗落山亦好煩﹗



行到呢個Sarangkot Village﹗



魚尾又若隱若現喇﹗



也許Sarangkot的最高點就是這個亭,不少遊客也到這兒看風景﹗



風光是極妙呢,又是可惜雲層極厚,但也無損西方朋友拍攝的興緻,佢地影完一張又一張﹗
我倆由於太早起身關係,睡眼惺忪,見睇唔到日出帶點點失望﹗



導遊一句問我地影完未,之後就開始我地既登山之旅,那是早上6:30am.........﹗
真係倒夜香都無咁早﹗

出發喇,由於只得我哋兩個人既關係,Mr. Happy講到明只要我哋想停便停,不用擔心太辛苦﹗而佢手提的就是我哋三個人既早餐﹗



香港行山行得多,真的想不到去旅行都可抽一日行山,那是一件很難忘的事﹗
風光當然大不同,遠望山景雄壯偉大,腳踏草地如畫,精神為之一振﹗



行了半小時就到達這間很特別的酒店﹗



在這兒享用我地既早餐,兩隻蛋、一個蘋果一條蕉再加多包蘋果汁,夠哂天然原野了吧﹗
絕對適合行山人仕﹗



這個行山行程包食包住,但就唔包飲品要自費,這是我在尼泊爾常喝的Black Tea,講真無咩茶味,味道淡淡的,但總比喝水易入口﹗



吃過早餐,開始走進山上的小村落,到處是田野,路是未開發的泥濘路﹗
是日天陰,行起來有點點涼風,初時走來全是平坦的,極易走,幾舒服呢﹗



路上見到牛兒在放草﹗
有牛當然有羊,細細隻很可愛﹗



路上常見每個屋舍旁都這怪怪設計的草堆,細問導遊下原來這是農夫儲起稻草,一層疊一層,為的就是保存稻草於冬天給牛羊吃﹗



全黑的羊行來行去令食家想起家中的大狗﹗



一路上發現其實有不少大麻草,導遊話這是野生的,當然純樸的山村農民不會用來焗乾做大麻啦﹗



農民是每天早上默默耕耘的工作。



山上的居民生活樸素,走在其中有一份很自然舒服的感覺﹗



其實沿途都有好多Guest House同埋餐廳,不過有冇人食同住就真係唔知喇﹗
現在正值旅遊淡季,我哋一路行,竟然一個行山嘅遊客都見唔到﹗



導遊Mr. Happy原來細細個在這個山村地方長大,一路行同佢一路傾吓計,咁啱經過佢細個讀書的學校﹗



路上盡是一望無際的田野﹗



由於天陰陰,個天又灰又黑,這張小湖倒影的相片算是拍得不錯的了﹗



這兒的生活還是落後的,真正用牛來耕田翻土,兩隻牛都拉得幾辛苦﹗



難得的是路面也不是難行,當地人以足代步,去邊都係行,學生行一兩個鐘返學是平常事,所以開出來的路雖然係爛少少,也算方便﹗
原文載於: 背包客棧自助旅行論壇 https://www.backpackers.com.tw/forum/showthread.php?t=721102#post4284848



如果有去過落後國家都會知道,當地最怕遇到的是小朋友搵你要錢﹗

我們在沿途中其中一小時就遇到這一對小女孩,她是在上學途上跟著我們,無端端走上來拖著食家的手,眼望望的想有求於你似的﹗食家當然鬆開﹗

有遊客會給他們點點錢打發,有的就給她們糖果,但我還是建議遊客像我們一樣,什麼也不要給,三幾歲的小朋友已養成這種乞求憐恤的惡習,長大了真不堪設想﹗



這隻小黑羊站了在石梯上,唔多識落番嚟,狀甚搞笑﹗



走了三小時已是10:00am,終於走到公路上,雙腿由於無休息過開始累,於是在公路的士多坐坐﹗



飲番支凍芬達先﹗好鬼累呀﹗



唔好話我累,這隻狗都累啦﹗
尼泊爾常見野狗四處走,由於當地人生活艱苦,人都未必有得食,唔好話尐狗喇,所以見隻隻都好瘦弱營養一般﹗



坐咗幾個字,導遊話只係行咗三分之一,聽到都驚一驚﹗
經過這所學校後,就轉入山路﹗



山路比之前的平路難行十倍,開始多好多上斜位﹗

行行吓仲傳來壞消息,有村民話俾導遊聽平日的行人路尋晚有山泥傾瀉,要在山澗位滑落山谷低先有其他路可走﹗
大家都知我歐洲人身型,行動掗拃身手欠奉,要行落的山谷成60度斜,真係驚險萬分﹗



好在導遊奮不顧身地捉住我地兩個落斜,唔洗死住,不過最大獲的事情發生了......
就係我倆的鞋內發現十幾隻水蛭...........



食家仲要俾水蛭咬了...........

到尼泊爾前在網上已知道行山水蛭為患,水蛭會咬住你吸血,佢地會釋放出麻醉及溶血成份,所以完全無痛無感覺止血亦有困難﹗

我哋兩個已經著哂長褲,隻仆街都仲要從你的鞋邊潛入,真係仆你個臭街﹗
導遊大力捉走水蛭,說明不要理佢一陣就無事,但食家精神已經幾近崩潰﹗﹗



路真的不難行,又斜,級又高,我倆開始行十步停一分鐘﹗



水蛭最怕鹽,我哋都在香港帶定海鹽隨身。
食家被咬後已經到了竭斯底理的情況,不停在腳上灑上海鹽,希望水蛭不要再來﹗



還有段小插曲是食家被水蛭咬了的時候,咁啱有位山地的婦人經過,見食家嚇得想哭,就與導遊一起為她整理腳上十多隻水蛭﹗
之後在袋中取出一大條青瓜,我倆心想可能想我們買她的農作物,故給了她金錢,由於言語未通我哋又擔心,未有深究,只想快點離開﹗

後來坐下﹗導遊話原來那婦人是好心協助,仲話食家長得很像她的女兒,所以送青瓜給她吃﹗很多謝她呢﹗這是在尼泊爾遇到的其中一位好心人,祝她生活永遠愉快﹗

我們將大大的青瓜給了士多的老闆,他切了一起吃,很清甜,導師說這是補充水份很好的食物呢﹗



這就是小士多了﹗一家人經營,賣水及飲品給行山客﹗
一起吃青瓜的時候,他們流露出很快樂的神情,知足真的常樂啊﹗



食家被咬後體能急劇下降,竟說想放棄前行,但已行了六小時,回頭太難了吧﹗
於是將背囊交俾Happy哥,輕鬆一點再出發﹗

最後兩小時的行程真係斜到無人有,全上,全梯級,抽筋咁濟,連平路都無﹗



我估我哋已經用盡所有力氣,導遊也知我哋快崩潰,行兩步就停一停等我地,沿途亦鼓勵:


"No worry. Take your time﹗"
"Climb up for 3 mintues...and then...flat...."
"Sorry I m not rushing you BUT you can rest at a stop not far away from here."
有如曹操望梅止渴的故事﹗



經過八小時的登山,我們兩個終於攜手到達平坦的Dhampus﹗



我倆今晚會住的酒店,Hotel Green Land﹗



酒店有像渡假營似的,簡單而骨子﹗
已經2:00pm,對腳已經不聽使喚,當然食野先啦﹗



風光極好,可惜的是天氣麻麻,極大霧,望落山只係霧都﹗



我們只有用酒精來麻醉自己,竟然在吃Lunch的時間連飲四支,可知我哋當時的情況﹗



酒店的老闆就是這對夫婦,兩個人經營這有十多間房的小旅館﹗



我想說老闆的手勢的全尼泊爾我吃過最好的,所有食物均即叫即做﹗

很開心是跟Mr. Happy行山,Menu內所有食物你都可以隨心點選,唔洗食Set A Set B﹗
我點了春卷﹗



用料多,有蛋、雜菜及雞肉,焗得恰到好處香脆極了,好好味﹗



食家點了芝士蕃茄通粉﹗



通粉煙韌,洋蔥粒下得多很香口,又係一百分的美味﹗



食完飯返房沖涼,點知俾我發現.............
我也給水蛭咬了,仲不停流血,我懷疑已咬了好幾小時﹗



細細條如紅虫的水蛭,發到成隻曱由咁大。
仆你個街........我一怒之下最後用海鹽將佢活活醃死,牠遇鹽即噴血不止,嘿嘿嘿.........﹗



房間無冷氣,就是簡簡單單的兩張床加多個茶几仔兩張凳。
有熱水,全日都熱的,在這等山區地方已很可幸呢﹗



沖完涼隻腳都仲係流緊血,細看下,原來成個酒店只得我倆一房客﹗哈﹗
兩個人霸哂成個酒店,真係人生第一次﹗



酒店一打開門就係一望無際的山景,風光極美好﹗
可惜太大霧........咩都睇唔到﹗



旅館雖小,但很有田園氣息﹗



這是走廊﹗



房間的近鏡,老闆笑著說叫我地唔好再走入草地,一陣又有水蛭咬又大呼小叫﹗

最後我得出被水蛭咬後的攻略:

首先盡量避免行入草堆及有流水的地方,凡路過後均檢查雙腳是否有水蛭附著,快快捉走為妙﹔
如真被咬了只要除下水蛭,便不用太在意,血流一會自然會止,你不停望住佢用紙巾印佢也於事無補,我就係白痴係咁印,印左個幾鐘仲流緊,痴線﹗



在房瞓番陣之後,Mr. Happy 5:00pm帶我倆去行行後山的小商店﹗



老實賣既野無咩特別,不過難得一來,也振興一吓當地旅遊買點手信吧﹗



由於酒店得我地一對,我地房門都廢事關了﹗
唔係講笑,尐霧係湧入房的,好誇張﹗



愈夜愈大霧,看不到風景呢﹗



未夠六點我們就去餐廳食晚餐喇﹗

細看下原來在這兒租一晚房只是600Rs ($60),好鬼抵呢﹗
導遊話11及12月旺季,這裡每天都爆哂呢﹗



食物製作需時,我倆同導遊傾下計,講講尼泊爾情況﹗
原來佢係大學畢業生,怪不得英文那麼好﹔佢話做導遊好睇淡旺季,收入不穩定,而家呢尐時候有工開已不錯﹗



如果天高氣爽的話,在Dhampus望出去的喜瑪拉雅雪山群就是這麼美麗﹗
所以我強烈建議如到樸卡拉旅遊的話,時間少也要來走走,兩日一夜行上Dhampus,得著真的不少呢﹗



係人都知我是蒜蓉怪,在餐牌竟見有Garlic Soup﹗
以蒜蓉、洋蔥蓉煮成的濃湯,味道真的太好太好太太好﹗
回到香港,我也對此湯念念不忘﹗



這夜我的主菜是雞咖哩配飯﹗



咖哩微辣帶甜,用來撈飯十分開胃﹗



蕃茄肉醬Pizza﹗



肉醬滿滿的,芝士下得多,批底焗得香脆鬆化,美味﹗

這店的老闆真係「隱世廚神」,如佢落番市區開餐廳應該大排長龍,每餐後我都會讚揚他煮的食物很好吃,他笑逐顏開﹗



原來在尼泊爾做行山導遊也不容易,要考牌又要讀書﹗
Mr. Happy就在已註冊的導遊,在下層中間,更是導遊會的成員,見到他嗎?

他這兩天對我地也照顧周到,細心,無所不談,膳食好酒店也好,故我也取了他的咭片,如有朋友想去樸卡拉找導遊的話,不坊找佢,我很推薦﹗
想要資料便在我Yahoo日誌留言吧﹗



食食吓酒店停電,在尼泊爾是司空見慣的了﹗



累到無朋友,買多兩支啤酒回房外吹陣水後,9:00pm便快快沖涼瞓覺﹗
這就是我倆驚險行山體驗之旅的第三天﹗


我的網址: http://hk.myblog.yahoo.com/smallsmallsmalllin
原文載於: 背包客棧自助旅行論壇 https://www.backpackers.com.tw/forum/showthread.php?t=721102#post4284848
Facebook齊齊飲飲食食: http://facebook.com/smallsmalllin
我的美食地圖: http://smallsmalllin.openrice.com/
我的飲食微博: http://t.sina.com.cn/smallsmalllin
4
回覆時引用此篇文章
smallsmalllin 的頭像
smallsmalllin smallsmalllin 目前離線
客棧之光
#5
文章: 612
性別: 男生
感謝: 222次/64篇
註冊日期: 2009-01-16
舊 回覆: 2012尼泊爾八日七夜登山體驗之旅 - 2012-08-13, 11:05
雖然酒店無冷氣,由於在山上既關係,都唔算熱,但至慘既係我地下午打開門既關係,飛咗隻仆街蚊入黎,捉又捉佢唔到,搞到瞓得唔多好﹗



第六年同食家去旅行,我地每次去都有驚喜,天公總做美,5:00am起身,望出窗外......Woooooo....



終於都俾我地見到大雪山喇,呢個就係人人都影既魚尾峰﹗



晨光出來了﹗



每十分鐘是一個變化,藍天、光與影再加雪山,真的美極了﹗



酒店的餐廳上面是個一望無際的平台﹗



只係得我地兩個賓客,唔洗同人迫,梗係影多尐相啦﹗
食家都唔放過,係咁用手機影影影﹗



得我地兩個,話之佢仆街,一睇就知無王管,爬上鐵欄拍照﹗
我敢講現場睇到呢個境真係好震撼架﹗

亦都好開心我地兩個有來到Dhampus,尋日行得辛苦也值得﹗



導遊同酒店老闆話,原來近一個月每天都濃霧,早上起來咩都睇唔到﹗
佢不停話我地兩個十分Lucky,竟然可以睇到如此美景﹗



我地既房間一打開門就可以睇到山景了﹗



趁天氣好,梗係曬下衫啦﹗
尋日行山尐衫又血又汗,唔洗唔掂﹗



睇完日出去開餐,老闆又精心為我整早餐﹗
我點了粟米包加Milk Tea﹗



粟米包甜甜地,又脆又香粟米味,即叫即做即焗,熱辣辣好好味啊﹗



食家點了洋蔥蕃茄蛋奄烈﹗



能在山上吃到如此美食,真的難忘﹗
最後我地總結這個尼泊爾旅程,最美味就是這兩天老闆的出品了﹗



吃完早餐8:00am,天都光哂了,又是一番美景﹗



是離開的時間,由於尋日俾水蛭咬既關係,我決定將褲腳攝入襪內,超級樣衰,但無辦法﹗
下山確無再遇上水蛭出沒﹗



走了,與老闆拍了幾張照片,找埋尋晚的啤酒數,我地大讚佢煮野食太美味,佢很開心呢﹗
由於美食同美景關係,我倆也有點不捨呢﹗



今朝起床對腳其實都幾痛,昨晚我都知唔掂已問過Mr. Happy,如行唔到落山點算﹗
佢話以前帶團都試過,3000Rs($300)一位可叫車送落山﹗



好在起身都不算極痛,還是慳番搭車錢行落山去吧﹗
上山要八小時,下山是第二條路三小時左右,全是石級路,落山梗係無咁辛苦﹗



烈日當空﹗



話就話落山舒服點,不過不停向下既樓級,行多兩步已經有點腳痺,七海健絡都補唔番﹗



Mr. Happy是放頭馬,不過佢必會在我倆的視線內﹗



沿路風景都不錯架﹗



依山而耕作的梯田﹗



尋日就天陰陰,今日曬到仆街,睇唔睇到呢張相,斜度真係嚇死人。
明明看到下面條馬路是終點,但行落去唔停都要行成個幾鐘﹗



三小時後終於都行完去到大馬路﹗
Thanks Visiting Dhampus Village﹗



完成Dhampus既行程是來到一條唔知咩村,有好幾間士多賣飲品﹗

等了十五分鐘都唔見司機來接送,Mr. Happy致電原來尋晚太大雨,其中一條公路有山泥傾瀉,我地架車入唔到來﹗



Mr. Happy都廢事等喇,見有巴士經過,即時叫我到跑到咁衝上巴士。
原來尼泊爾既巴士係無站的,你鍾意上的話遞手司機就會停車,原本以為十分陳舊,但估唔到係冷氣都幾涼,座位亦清潔。

當地人見我地兩個中國人搭車,都投以奇異既目光﹗



不過有樣野十分之仆街,就係有人落車時,架車唔等人落哂照開,食家最後一個落車,司機竟開車搞到佢跌了一交﹗
好在屁股夠多肉,唔係有骨折的危險﹗



怪不得架車入唔到來接我地了,原來尋晚的山泥傾瀉搞到有條村的家園盡毀﹗

尼泊爾時有這種情況,就係村民凡有咩事都好都會走出來人肉封路,瞓哂o係地上,迫政府派人來調停,之前睇網上遊記已知無論係車親人又好,撞親農作物牛羊又好,尼人都總動員幾十人玩封路﹗

香港連衝出馬路示威都俾人抬走,所以雖然被阻,我地兩個對尼國人既敢作敢為十分敬仰﹗



幸好當地政府既反應也不慢,半小時後傾掂數,村民放行,我地終於可以返酒店了﹗

回到酒店,我地兩個好似久歷奇遇彷如隔世似的,與Mr. Happy來個深情的擁抱。
呢兩日雖然很辛苦,但體驗很多,美景在腦海久久未能釋懷,加上膳食是一百五十分﹗
我地對Mr. Happy既服務亦很讚揚,故兩個加埋給了豐厚的貼士作感謝並說再見。

他見到貼士後十分開心,亦放下了自己的咭片給我,叫我地下年如再來行山記住要搵佢,如有朋友想到尼泊爾行山,可在我Yahoo網址留言,我可將他的咭片轉寄給你。



在酒店沖番個熱水涼,爽哂﹗休息一陣之後就坐酒店車去玩Paragling﹗
酒店車我地到滑翔降傘的公司,之前兩天在lakeside行街時已見過呢﹗




入到來要填form買保險,好似簽生死狀似的﹗



填完form等左一陣之後就有架美軍似的吉普車來接我地出發到山上﹗
山路十分崎嶇,全部都石仔路 ,行左半個鐘終於到飛行地點﹗



我同食家分開由教練帶領飛行﹗



由於我有畏高關係,見到要衝落山再起飛開始有尐心跳同唔多舒服﹗



導師及同行的助手開始打開裝備,在這兒放出降傘﹗



就係咁喇﹗
掛在你身後的背包會扯住降傘,之後教練會在你後面同你一齊向前衝,降傘飛起一跳,感覺有如衝落山似的,之後就飛上天上﹗



食家已準備好,佢一次就飛起左喇﹗

反觀我由於又緊張又身重,搞左成三次先飛得起,個尼泊爾教練哥仔係咁叫救命,叫我冷靜尐跟佢步伐,真係哭笑不得﹗

最後試到第三次,終於飛得起,導師都呼了口大氣,我估再飛唔起佢會退錢叫我返屋企﹗



飛在天上那種無重的感覺十分奇妙﹗
開頭有點點驚,慢慢定左就好舒服﹗



由於飛行十分平穩,個個都會帶上相機在一路拍照﹗
自己影就當然只係影到對腳啦﹗



波卡拉很美,是藍天,山丘與Fewa湖﹗

附件 632312

出發前教練會問你要不要幫你影相,影相的話每位加17US,其實又不算太貴。
呢個導師好識做,不停叫我在天上擺唔同既過癮Pose,佢就會用來伸長的鏡頭同我影相﹗
又係那句,人一世物一世,咩都試下,唔好介意幾多錢﹗



飛行時高時低,我到處在找食家的蹤影,見佢飛到九十幾樓咁高,我同導師講我都想飛高點﹗

點知導師笑笑口話:" You know Gravity!?Haha﹗"
意即話我好鬼肥大,無可能飛得咁高...............真想講句"Fuck﹗"

大家見不見鏡頭?導師就係幫我係咁用佢拍照,最後影左成百幾張相﹗



發現食家蹤影﹗就在我的前方﹗



再近點,佢教練都幫佢影緊相喎﹗


原文載於: 背包客棧自助旅行論壇 https://www.backpackers.com.tw/forum/showthread.php?t=721102#post4284853

快降落了,會先在湖邊徘徊一陣﹗



要在降傘上影相其實都幾難架﹗手要定,唔好震﹗
食家安全降落,反觀我就..........失足跌了一個狗吃屎.......﹗
又俾教練屌﹗



降落的地方在湖邊﹗



這張圖畫很過癮了吧﹗

之後我地坐番車去飛行公司,教練過番尐相俾我地,燒埋碟﹗
來波卡拉一定要玩paragling,真係一流,好好玩﹗飛行的體驗極美﹗



趁佢燒碟,我地兩個行左去旁邊Supermarket,值得一行呀﹗



俾我地見到當地土炮印度Condom,嘩,全部個封面都係露點的,我就梗係買尐返香港做手信啦﹗



降傘公司個女職員話呢頭最好的餐廳係行前兩條街既Busybee﹗
我地兩個就一於去試試﹗



Busybee,價錢同一般餐廳差唔多﹗不算太貴﹗




在波卡拉的所有活動都已經完畢,最後一天,當然嘆啤酒﹗



原來呢間Busybee夜晚有歐國盃直播,待應為我們推介﹗
仲話買啤酒買三送四添﹗



店內有兩大隻黑白狗在曬太陽,好鬼過癮﹗瞓個不易樂乎﹗




行完山又滑完降傘,內心興奮,點全場最貴的牛扒來吃﹗Rs 500($50)



食家就點了雞扒配薯菜﹗



好老實,來尼泊爾唔好點牛扒,都係食番意粉Pizza最穩陣﹗真係唔好食的﹗哈﹗
反而食家的雞扒就幾好味﹗



飲左三四罐大啤,最後埋單Rs 2000($200) ,最是這旅程我地兩個吃最貴的一餐﹗
其實一點也不貴﹗



環境唔錯架﹗向海,在樹邊葉底可以見到Fewa湖﹗



很有田園風味的餐廳﹗
整潔,待應很殷勤,值得推介﹗

飲飽食醉,由於極累關係,我地兩個返咗酒店瞓午覺﹗


瞓醒又九點﹗尋日行山真係太累了,成身肥肉都好似痛痛的﹗
行出Lake Side再搵野食,去了網上同旅遊書都有介紹的Once Upon A Time﹗



時值10:00pm,完全無人,得番我地一枱客﹗



坐在窗邊,可以看到Lakeside大馬路的街景﹗



尼泊爾有一味叫香辣雞,我地點來試試﹗



好明顯係抄生炒骨的,但雞肉未炸過,只是埋個酸辣汁,香港俾佢做得好很多﹗



再點的是芝士菠菜闊粉﹗



芝士極多,又香又飽肚,好味道﹗
加多兩支啤酒1200Rs($120)埋單﹗

本來心諗最後一天玩大佢,但明早要7:00am起身搭五個鐘巴士到哲雲,怕飲大了唔記得起身就大鑊﹗
最後都係買兩支Beer回家飲吓便算﹗
原文載於: 背包客棧自助旅行論壇 https://www.backpackers.com.tw/forum/showthread.php?t=721102#post4284853

這是我倆最後一天在波卡拉的第四天行程,尼泊爾每一天總叫人回味無窮﹗


我的網址: http://hk.myblog.yahoo.com/smallsmallsmalllin
Facebook齊齊飲飲食食: facebook.com/smallsmalllin
我的美食地圖: http://smallsmalllin.openrice.com/
我的飲食微博: http://t.sina.com.cn/smallsmalllin
3
回覆時引用此篇文章
smallsmalllin 的頭像
smallsmalllin smallsmalllin 目前離線
客棧之光
#6
文章: 612
性別: 男生
感謝: 222次/64篇
註冊日期: 2009-01-16
舊 回覆: 2012尼泊爾八日七夜登山體驗之旅 - 2012-08-13, 11:05
尋晚都幾早瞓關係,今朝特別醒神,第五天的早上要與波卡拉說再見。



從房間向外望,今天又濃霧滿天,看不到雪山美景,所以話我地兩個尋日在Dhampus真係十萬個幸運﹗



酒店的早餐也挺豐富,分量夠哂多,一個人根本吃不完﹗



吃過早餐收拾好行李,8:30am便要到大堂集合,因我地訂咗9:00am出發Greenline的巴士到哲雲。



左邊那位就是經理Raj,佢知我地走都特登行埋黎問我地呢幾日玩成點﹗
我答佢很滿意,佢亦叫我地兩個可以上Tripadvior幫佢賣吓廣告。而家寫遊記先記得我地仲未上去留言添,之後整番﹗



酒店車我地到巴士站,先寄存大件的行李,再上Greenline的巴士﹗



從車窗望出去是Greenline的Office﹗由波卡拉到哲雲的車程是5小時﹗唔知係咪早出發既關係,架車竟然唔開冷氣,吹鬼脹﹗



行車個半鐘左右會到一個大站作休息十五分鐘﹗
搭親長途車就實有呢尐機會,都係落車痾下尿,放個屁咁﹗



買了包印度出的All in One Nuts,唔掂,全部食物都碎碎濕濕咁,棄之.........



其實在車上一路的風景也不錯,離開波卡拉市區後,其他地方更窮,大多都是農田及園野,亦見不少簡約的矮樓房。



搭了兩個小時左右,巴士載我們到一間Resort吃午飯﹗
我地都唔知原來搭車是包午飯的﹗



呢間Resort環境很不錯呀﹗
Greenline巴士服務同質素果然是尼泊爾最出名的﹗



食物很簡單,就是咖哩雞、雜菜等,自取任食,仲有茶啡任飲,味道唔錯,包你吃飽﹗



吃完飯飽飽,再上車竟然發現原來這Resort是一個中途站,早上搭的大巴目的地不是哲雲的﹗去哲雲就要在這兒轉車﹗
由於時值旅遊淡季,我地兩個轉咗上一架七人Van仔........車上只得我地兩個同司機,變相包車,發達了﹗



轉咗車爽好多,起碼車上有冷氣,食飽瞓左個幾鐘陣之後,兩個幾鐘左右慢慢已到達哲雲,又估唔到都幾熱鬧﹗



最後2:00pm我地終於順利到達哲雲的巴士總站﹗真係坐到屎弗開花﹗
我倆book的Unique Wild Resort有位小兄弟來接送﹗



架車只係得我地兩個,唔通今次哲雲酒店又係得我地兩個人?



十分鐘就去到Resort喇,呢個就係經理,送上Welcome Drink,核對我地既入住資料﹗
想說我地兩個呢次旅行所有Book既酒店,除了加德滿都外是學聯Package外,其他全部都係上佢地既酒店網頁直接向酒店傾價錢,由於時值淡季關係,酒店都願意提供比較便宜的價錢呢﹗

這間Unique Wild Resort我地訂左三日兩夜Package,包酒店住宿、所有活動及三餐,每人US 95($750),抵爆﹗
就我地所體會,只要你唔飲啤酒凍飲既話,基本上唔洗洗其他錢。


原文載於: 背包客棧自助旅行論壇 https://www.backpackers.com.tw/forum/showthread.php?t=721102#post4284859

之後發現原來今天只得我地兩個客人及一家四口的印度Family。
先說房間,房間整潔,空間大,有冷氣及熱水,唔錯呀﹗



供電方面,早上9:00am後及中午通常都會停電,而夜晚就無問題,即係瞓得好﹗



再講酒店位置,離Town Centre大約十分鐘腳程,位置在街道最角位,故不會聽到車聲及遊人叫罵聲,清靜舒服﹗
酒店空間也挺大,在農田旁,四周種滿花草樹,感覺田園清新亦自成一國。



就在房間行過對面就係酒店餐廳喇,我地梗係坐出面啦﹗



其實頭先坐車休息時已吃過午餐,但來到酒店既然包埋又忍不住要再吃﹗
食物無得選擇,人人一樣,是日午餐是蛋花粟米湯﹗



有通粉、炒飯、雜菜、白汁雞及薯條,睇見都飽吧﹗哈﹗



唔知係咪淡季無咩人會來的關係,這隻瘦瘦的狗仔見我地在餐廳,便一直坐在我們隔離﹗
我們便把午餐的炒飯給牠吃,牠吃得十分開心﹗

估唔到一飯之恩佢永記於心,這三天只要我們在resort內,牠便無時無刻的都跟在我倆後面,連入房瞓覺佢都在門口守侯﹗



吃過午餐,經理又走過來同我地講講這三天的行程。
活動都set得幾好,起碼活動與活動之間都會有休息時間,岩哂我地呢尐HEA人﹗
原文載於: 背包客棧自助旅行論壇 https://www.backpackers.com.tw/forum/showthread.php?t=721102#post4284859



食完午餐先3:30pm,當然入房涼下冷氣,Show下我地買左咩無聊野先﹗
Condom佔大多數,買左成廿盒﹗哈﹗



導遊話天氣是38C,仲要極潮濕,只要有一刻離開冷氣,唔洗五分鐘我已全身冒汗﹗
真怪不得是淡季,呢尐夏天日子來哲雲要有心理準備﹗



這個是哲雲國家公園的地圖﹗



來國家公園會入森林,這兒最出名的是大象、獨角犀牛及鱷魚﹗



5:00pm出發喇,今天的活動是到處走走,去國家的大象保育中心﹗
這是Unique Wild Resort的入口﹗



先是參觀哲雲的原住民的Thrau Village,當地仍有不少居民以古代生活方式生存呢﹗



尼泊爾街頭大多只見到流浪狗,在哲雲反而貓居多。



要介紹呢三日同我地一齊參加所有活動的印度家庭,爸媽及兩兄弟。
可能我地係亞洲人關係佢地好似對我地有尐芥蒂,全程都無咩傾計﹗



再參觀是政府的大象保育中心﹗
我地兩個一向都好鍾意大象,來哲雲就最岩,因象兒成日在條街走來走去﹗



成日見到大象打起沙塵,原來佢地唔係玩沙,而係因為多蚊既關係,佢地將沙塗在身上以避免俾蚊咬﹗有如我地塗蚊怕水,真聰明﹗



我成日覺得大象好似隻隻個樣都係笑緊似的﹗



呢個肥佬就係我地呢三日既導遊喇,每有參觀的都是佢帶隊的﹗
佢雖然日日在哲雲,但天氣由於太熱關係,佢都熱到成身汗話好辛苦不停抹汗﹗



在這兒住的大象有福了,因為除了有嫩葉吃外,仲會有專人用草包住尐米呀營養飼料等俾佢地食,佢地叫做「Candy」,見佢地食得好開心﹗



睇完大象,我地又出發去其他景點喇。
在這兒記住要做好防蚊措施,唔係會俾蚊吸乾你的血﹗



我們到了哲雲國家公園的博物館,得幾個標本,又熱又焗空洞洞的無咩好睇﹗
只係見到呢尐有機會在國家公園出現的動物介紹﹗



穿山甲都有喎﹗不過見唔到﹗



印度朋友可能由於太熱關係,對任何事也提不起興趣﹗



是日最後一個行程是在湖邊看日落﹗



可惜的是天濛濛,日落就一定睇唔到架喇﹗
38度的大熱天氣下,我同食家件Tee都濕咗九成,導遊問我地有冇興趣,我地第一時間耍手擰頭,之後搭番車回酒店﹗



回房沖個涼,吸番半小時冷氣後,精神哂,我們到餐廳吃飯﹗
今晚的活動是去睇民族表演,我地零興趣於是同導遊講不出席,自己出去行吓好過。



是日晚餐再次是薯條白飯,仲有尐好似糖醋排骨似的餸菜﹗

想說這兒的待應十分有禮,雖然好多時候都只係得我地兩個客人,但佢都十分用心招待。
由於我地去親餐廳就係隊啤,由朝飲到晚,第二次來吃飯佢一見我地已問係咪要Beer了﹗



吃過飯才8:00pm左,我們諗住自己行10分鐘去市中心買下手信飲下野,點知出到去都驚一驚,因為呢十分鐘路程全無街燈﹗

無街燈都唔緊要,因我地有電筒又認得路,最可怕係尼泊爾人竟然可以在全黑無星無月亮光既環境下走來走去,明明以為前面後面無人突然在黑暗中有個尼人經過你身邊,仲要同你講Namaste(你好),你都咪話唔驚﹗



可能是淡季關係,市中心入夜後只有少量餐廳經營,於是我地兜左個圈之後打道回酒店﹗



就在酒店前100米,見到有間有微光既田園士多,入面有不少外國遊客在門外飲Beer。
既然找不到酒吧,就在這兒盡興吧﹗

這兒原來由右手面那澳洲藉女子Susan打理,佢好開心有人來幫趁,仲走埋黎同我地傾計,佢話其實佢想將這個田園打造成廉價的小旅舍,讓背包客能有便宜的居所,佢已做好幾間房,但好可惜的是這兒取不到電,無燈無風扇又無得叉電,故很難經營﹗

咁岩今天竟然有個澳洲藉中年背包客入住,原來只係收300Rs一晚($30),有瓦遮頭算係咁吧﹗但晚上溫度仍是36度左右,我估都相當難捱,我就一定會瞓唔著了﹗



這隻是Susan的寶貝﹗肥肥的乳牛貓﹗好可愛﹗



就係咁,我地兩個今晚就在這兒飲了八支大啤,飲到十點幾返酒店瞓覺﹗

由於佢地無電,一開電筒見光就有幾百隻飛蟻草蜢昆蟲等跳埋來,我只可以說觸目驚心﹗
在旅行中能與不同的過客傾計,感受大自然的氣氛,是件挺快樂的事,雖然內容來來去去都係那些膚淺問答,但總有得著﹗

這就是我倆在尼泊爾哲雲國家公園的第五天﹗


我的網址: http://hk.myblog.yahoo.com/smallsmallsmalllin
Facebook齊齊飲飲食食: facebook.com/smallsmalllin
我的美食地圖: http://smallsmalllin.openrice.com/
我的飲食微博: http://t.sina.com.cn/smallsmalllin
4
回覆時引用此篇文章
smallsmalllin 的頭像
smallsmalllin smallsmalllin 目前離線
客棧之光
#7
文章: 612
性別: 男生
感謝: 222次/64篇
註冊日期: 2009-01-16
舊 回覆: 2012尼泊爾八日七夜登山體驗之旅 - 2012-08-14, 12:50
話咁快就到第六日喇,今朝要5:30am起身食早餐,因食完就要騎大象入森林﹗


原文載於: 背包客棧自助旅行論壇 https://www.backpackers.com.tw/forum/showthread.php?t=721102#post4288976

昨天的瘦狗仔原來今朝在我倆的房門等我地﹗佢一定十分肚餓了﹗



我明明買了明信片回加德滿都時寄出給朋友及自己,可惜到我寫遊記這刻已成個月還未收到﹗

係咪寄失左呢?定係加德滿都Thamel那間書局呃我錢?



酒店的早餐很豐富,我們給了瘦狗數片麵包,牠滿意地吃了﹗



食完早餐就集合,我地跳上小貨車到騎象的地方﹗瘦狗追了出來......



導遊尋日已叫左我地今天要穿長褲及波鞋。
但印度家庭依然故我,全家總動員四人一齊著拖鞋及短褲,見到真係笑死﹗



十分鐘車程,我地到了森林的入口﹗



呢個騎大象入森林活動叫Elephant Ride Jungle Safari,來過哲雲Chitwan的一定知曉,是必玩活動﹗
一隻大象一個象夫再載四個人就出發﹗



我幾時都講我地是最幸運的,食家在出發前本來擔心唔知要同邊對人一齊坐象。

點知去到,導遊小哥話要印度四人家庭分條友過來與我地坐﹗
佢地四個當然耍哂手表示抗拒,最後是我地兩個一隻象,真係多謝佢地﹗呵呵﹗
變了我們的私人大象旅程﹗



走上象籃時要小心點,因大象有時會郁來郁去,一不小心會飛落街﹗
就現場所見,好多朋友都對我地只兩個人就可以騎象都報以奇異的目光,遊客更是羨慕不停指指點點﹗



好,我地兩個坐穩喇,大象出發﹗



象夫哥仔先去入口取飛登記﹗



然後就向森林進發﹗根據網上資料:

在尼泊爾有一處叢林是野生動物保護區,它叫做哲雲/奇旺國家公園( Royal Chitwan National Park )奇旺位於距加德滿都 120 公里的雷普提谷地( Rapti Valley )占地 980 平方公里,英國王室最早覬覦這塊土地來此「狩獵」,也是尼泊爾王室的御用狩獵場, 1961 年才正式對外開放並禁止狩獵, 1973 年成為尼泊爾第一座國家公園,其目的為了保護即將瀕臨絕種的獨角犀牛。 1984 年被聯合國教科文組織列入世界遺產。現在的奇旺境內有鹿、獨角犀牛、野豬、孟加拉虎、野像等超過 50 種哺乳動物,和翠鳥、老鷹、夜鷺、犀鳥等 525 種鳥,據當地導游表示,在 2 、 3 月時看到老虎和一些罕見動物的機會相當頻繁。



好老實我都係第一次入森林,仲要騎住象行兩個鐘,我估唔係人人試過﹗
自已騎象影唔到自己,只有影下印度家庭大家再幻想我地在象上情況吧﹗



森林當然多樹,大象唔會理你只管向前行,故路上要小心有樹上的樹枝,蜜蜂巢等,萬一打中都咪話唔痛﹗
一路上都幾多丫枝打在身上,很懷疑穿上短褲拖鞋的他們有冇割損﹗



在象上看風景,感覺特別寫意﹗



行森林當然為左睇動物,話說由於大象有自己的氣味,會蓋過人類,故你騎在牠身上其他動物不會發現你﹗

來哲雲國家公園,很多朋友就是為了一看的就是看這獨角犀牛﹗



這印度獨角野生犀牛層皮好似著左鐵甲似的,好有型﹗是受保護的動物,全球好似得番千幾隻吧﹗

犀牛並非經常出現,很多遊人來到森林也未必會遇到呢,我們都算好幸運了﹗﹗
佢地好似好嘆咁在玩水﹗象夫會停下大象俾我地影下相,拍下照﹗



除了睇犀牛之外,仲見到好多小鹿群﹗



你地睇後面印度家庭玩得幾high﹗



除了在森林漫步,騎象最過癮是落河,在象上好似就跌就跌落河咁﹗



衝呀﹗



大象我估佢都幾辛苦,一落河第一時間就勁飲水﹗



印度朋友幾Happy﹗



再穿越大平原﹗
來哲雲騎象其實好似分好幾種價錢,我們這次旅程是兩小時的,好像有些去到四小時﹗
但我老實說,可看到的動物品種並不多,開頭一小時還覺得幾過癮,及後時間在森林走來走去其實也挺悶的﹗所以兩小時夠哂數﹗



巧遇來加德滿都飛機上帶團的那香港導遊,大家在象上擦身而過,互相打招呼﹗
香港旅行團的團友見我地可以兩個人一隻象,即時投以羨慕的目光﹗哈﹗



兩小時終於到終點,這個小兄弟就是我倆的象夫,見佢都幾落力幫我地搵動物﹗
小費不可少吧﹗



終點有些尼國姐姐會賣些香蕉給你,50Rs($5)有一份。
我們買了兩份請今次勞苦功高的大象哥哥吃﹗再拍些照片﹗



吃完香蕉,大象開心得大叫﹗謝謝你啊﹗



騎完大象回酒店休息一小時,車都未落阿瘦狗已在門口等我們了﹗
未有飯開喎,無野俾你食﹗



這張照片最能表現哲雲39度有多熱。
我在房間沖完涼再行出門口三分鐘,手上的每一個毛孔已經在冒汗﹗痴那線﹗



中午前的活動是Elephant Bath,我地兩個都無諗住玩,因為見到條河其實好多象屎﹗



印度家庭的小朋友參加,佢話就話係行程,不過其實完成後都要俾100Rs小費象夫的﹗



其實唔係Elephant Bath,係Elephant同你Bath,大象會吸入河水再射在你身上,就係咁玩幾十吓左右,小朋友當然開心,我地就叫導遊幫手影下相便算﹗



玩完之後乘車回酒店,我地兩個決定不在酒店午餐,自己於中午行出去市中心吃飯﹗
天雨關係,成地都係爛泥,對波鞋真係唔洗要﹗踩完屎似的﹗



市中心無咩遊客,十分憩靜﹗
當地居民一見到我地都會投以奇怪的目光,也許覺得做鬼咁熱都會有人來哲雲﹗



找了一間在路邊的小店開餐,叫Typical Nepai Kitchen﹗



小店既是Kitchen亦係士多,由一個尼泊爾婆婆經營﹗



也許沒有遊客關係,我們點了菜,婆婆先叫我地坐坐自己走去街市買餸﹗
哈﹗真係即叫即買即煮﹗



這款芒果汁幾好飲﹗



我點了尼泊爾雜菜春卷。



食家就點了雞肉MoMo,雞肉MoMo一咬皮煙韌亦有肉汁,好吃﹗



春卷個皮就嫌佢厚了點,但即叫即做的食物,總覺得美味﹗最後食鬼哂﹗



這間小店價錢便宜,十幾蚊就有一個餸,反而嘉士伯最貴要Rs 270($27)。
最後坐左個幾鐘Rs 800($80)埋單,好抵食﹗



這兒肥貓我地坐咁耐佢就坐咁耐,見佢好似好肚餓咁給了牠吃薯條,佢吃得很開心﹗



在市中心行逛,見有間精品店的老闆在自己造手工藝,入去看看﹗



老闆很Nice,不停為我地介紹佢既木製精品,我地都忍唔住買番幾件,記住佢有木製的小犀牛鎖扣很可愛,只要Rs 100($10)一隻﹗
又係那句,記住要講價﹗



步行回酒店,酒店旁有一家人自己養了兩隻大象,唔知叫佢地去邊呢?



這就是我們住的酒店喇,我倆住在下面的一層﹗



酒店其實幾大好多客房的,但由於無遊客,變相我們霸哂﹗
原文載於: 背包客棧自助旅行論壇 https://www.backpackers.com.tw/forum/showthread.php?t=721102#post4288976



瞓了個午覺,4:00pm又再出發,這家就是我們尋晚去飲野的無電士多。
店主Susan見我地出去玩都會同我地揮手﹗



下午的旅程是沿河划船遊森林,為的是要睇河上的鱷魚﹗



一條船坐我地兩個及四人印度家庭再加導遊及船夫﹗



出發,天色突然陰暗,仲下起雨來﹗


雨愈來愈大,我又無傘,慘慘慘變落湯雞﹗




導遊話這個是鱷魚洞﹗

可惜的是全程只係睇到一次鱷魚眼在水面,睇唔到成條鱷魚,導遊話六月不是季節,如到入秋後會一排排在河邊曬太陽,十分壯觀﹗



船程一小時,之後是一小時的森林步行探險﹗



山就行得多,不過真係走入森林行都幾得意,大部份動物其實都聽到人聲所以會避開,只有遠遠去睇佢地生態﹗



遠遠望見小鹿群,其實已很興奮呢﹗



之後去了大象培育中心﹗
這是象的頭骨﹗



大象原來識聽訓練員的指令,這是不少象夫會用的指令說話﹗



在園內有好多小象仔,十分可愛﹗



由於只得幾個月,佢地行路好似跌下跌下似的,個樣子又傻傻地,好搞笑﹗



小象總是黐在爸爸媽媽身邊,連鐵鏈都唔洗,行幾步佢又走回象爸旁﹗



都好多小象在這個培育中心呢﹗



呢隻好似係三歲,個樣已經成形﹗



行咗成個幾鐘,已經接近六點半要回去了﹗



咁岩俾我地見到有人趕牛羊,一群牛羊衝過河的奇景真係都幾震撼架﹗

晚上在酒店吃過飯,由於太累關係,食家又有點身體不適,今晚都係乖乖在餐廳叫多兩支啤酒,留在酒店飲完就瞓了﹗

明天中午要乘飛機回加德滿都,這是我倆在尼泊爾哲雲的最後一天﹗


我的網址: http://hk.myblog.yahoo.com/smallsmallsmalllin
Facebook齊齊飲飲食食: facebook.com/smallsmalllin
我的美食地圖: http://smallsmalllin.openrice.com/
我的飲食微博: http://t.sina.com.cn/smallsmalllin
5
回覆時引用此篇文章
Mikejr Mikejr 目前離線 Mikejr 已通過手機驗證. 門號所屬國家:Taiwan
背包客
#8
文章: 16
性別: 男生
感謝: 3次/3篇
註冊日期: 2012-04-08
舊 回覆: 2012尼泊爾八日七夜登山體驗之旅 - 2012-08-14, 17:15
蠻詳細精彩的遊記
回覆時引用此篇文章
fabio00000 fabio00000 目前離線
客棧之光
#9
文章: 2,522
性別: 男生
感謝: 1,086次/763篇
註冊日期: 2008-11-25
舊 回复: 尼泊爾八日七夜登山體驗之旅 - 2012-08-15, 08:49
活络油涂在鞋袜处,水蛭(蚂蟥)不会爬上来。
回覆時引用此篇文章
chrischiu chrischiu 目前離線
客棧之光
#10
文章: 329
性別: 秘密
感謝: 17次/13篇
註冊日期: 2005-09-02
舊 回覆: 尼泊爾八日七夜登山體驗之旅 - 2012-08-15, 09:29
真是好文!! 大推!

沒去過尼泊爾,但看這篇遊記感覺很過癮!!
回覆時引用此篇文章
smallsmalllin 的頭像
smallsmalllin smallsmalllin 目前離線
客棧之光
#11
文章: 612
性別: 男生
感謝: 222次/64篇
註冊日期: 2009-01-16
舊 回覆: 尼泊爾八日七夜登山體驗之旅 - 2012-08-15, 09:36
話咁快就去到第七天,亦都係呢個遊記既最後一回﹗
最後一天的活動本來是去森林睇雀,但我地兩個對雀真係無咩興趣,故尋晚同導遊講定不會出發,亦都私人醒左尐美金俾肥佬當小費﹗



唔洗六點起身,我地九點先慢慢起床收拾細軟,再去餐廳食埋早餐,回來坐多陣﹗
由於住咗幾日又根本無咩住客關係,同幾個呢度執房的小兄弟傾多兩句,得知他們的人工不多,但好奇怪第一晚見到佢地可以出去隔離士多買啤酒飲﹗

最後我將在機場買的美國香煙送予他們,他們很高興﹗



是時候離開,瘦狗仔一直送我地出門口,真係一飯之恩天天記住,我倆雖然唔多敢掂佢,不過由於日見夜見也生了感情﹗狗仔你要努力呀﹗自己出外搵食啦﹗

整體來說Unique Wild Resort的服務不錯,房間舒適,位置獨處一角夠寧靜,餐廳食物很好,待應生與服務生也有禮貌盡量協助,肥佬導遊係Hea少少但其實又真係太熱,最緊要價錢不貴,US 95玩三日兩夜全包抵到爛﹗推薦呢﹗



11:00pm 導遊送我地兩個到機場,Resort離機場約半小時車程左右﹗



又係同出發講同一句說話,尼泊爾的內陸機真係唔洗咁早就到機場,餐廳都無間,鳩流流呆等,飛機又無咩人搭,根本過關安檢就5分鐘已搞掂,在機場真係悶到抽筋﹗



呢張就係回程加德滿都的機票了﹗
又要多談這張機票,是在波卡拉最後一天忍受不住酒店經理的推薦而買的,本來US 100一張,最後講價只可講到US 80一張﹗

其實我倆也掙扎了兩天,因兩個人價錢也挺貴呢﹗不過算了吧,最後一天,都費事舟居勞頓,搭飛機﹗



哲雲/奇旺國家公園的大地圖﹗



我倆又算好運,今次回程飛機由於天氣好,沒有Delay,可以12:30pm準時上機﹗



細細的機場就係咁簡單,推門自己行去搭飛機﹗


原文載於: 背包客棧自助旅行論壇 https://www.backpackers.com.tw/forum/showthread.php?t=721102#post4292206

這就是可愛的超小型哲雲機場﹗

昨天行程提到那一家木雕刻精品店,在那兒就有這個哲雲獨角犀牛的鎖匙扣買﹗
我們掛在背囊上,及後乘飛機回香港,同行的香港人都話這匙扣很可愛有趣,如在哲雲的話不坊買番幾個﹗



十五分鐘便到達加德滿都,領取行李後又要搵的士回Thamel,的士架架都話公價是600Rs,我開價300Rs,最後400Rs($40)成交﹗



回到酒店已是2:30pm,再次check in Hotel Marshyangdi,放下行李我倆又出去走走﹗



帶著旅遊書,路經一間咖啡店,唔記得店名。



簡約的點件三文治及咖啡,吃完便走﹗



第一個目的地是Garden of Dreams。



此地方是以前唔知邊個皇室的私人庭園,及後開放收入場費俾市民入場。
在尼國這等落後國家出現這種人工的美麗後花園,老實講顯得格格不入﹗




四處是歐陸式的亭臺樓閣。



環境係不錯,但佢既設計極多暗角,唔知幾時開始已經成為偷情勝地﹗
不少情侶在暗角處摸手摸腳摩摩揸揸,好似在這兒公然親熱是合法的﹗



這些其實並不過份,我眼見有更過份直頭女騎在男身上郁下郁下.......不過廢事影人相吧﹗



小子的手開始有所動作﹗



真係大開眼界,園內有餐廳,還是吃些東西冷靜一吓比較合理﹗



呢個咁既偷情花園入場費每人是Rs 160($16),好老實講十分搵笨,也許當地人未見過如此人工美景,但我絕不建議香港人參觀﹗

其實無咩特色,行兩步就有情侶在你面前卿卿我我,你會一路行一路小﹗




點了海鮮湯及意粉,味道麻麻,價錢亦貴﹗



嘩﹗好開心啊..............woo.............﹗



埋單Rs 1500($150),現場所見其實都無咩遊客到訪,睇黎都係我地兩個白痴才會來﹗



要睇此等建築來「香港公園」吧﹗
唔洗錢,又大又靚﹗呢度真係要負評﹗



之後我地下個景點係Durbar Square,跟住旅遊書又問下人向前行﹗



再一次經過第二日到過的舊城街市﹗肥鼠在白天也橫行無阻﹗



行行下其實都已經蕩失路﹗迷失方向﹗



原文載於: 背包客棧自助旅行論壇 https://www.backpackers.com.tw/forum/showthread.php?t=721102#post4292206

明明係街市,中間唔知點解有個廣場有個大銀幕,唔通夜晚在街市有波睇?



唔知係咪星期六既關係,行人多得很,當然對我地呢兩個中國樣貌的人投以奇異的目光﹗



途中亦有個好奇怪的尼泊爾阿伯跟住我地後面,不停問我地係咪去Durbar Square,我地唔敢亂應佢。

我估佢係想做我地導遊吧﹗行咗兩條街佢亦知難而退﹗



終於到達Durbar Square﹗



好老實我地對古跡的興趣是零,入場亦好似要成百蚊港紙,於是決定唔鬼入去,只係在門外影兩張相便算﹗

叫做Check咗個point﹗﹗



旅遊書話有個地方叫New Road新馬路,相當繁華,有全加德滿都唯一的油柏路,原來就在Durbar旁﹗

馬路兩旁的店鋪確比之前簡陋的街市士多光鮮,賣的以手錶、電話、太陽眼鏡及衣服鞋襪為主﹗尤其以太陽眼鏡店最多﹗看來加德滿都富起來的象徵就是要帶黑照﹗



旅遊資料話呢個商場是全加德滿都最勁既Shopping Mall﹗
叫Bishal Bazar﹗



入面賣既係珠寶、太陽眼鏡及衣物等,遊人止步吧,真係唔岩你的﹗哈﹗



行到6:00pm,雙腿酸軟又熱又濕,是加德滿都的尾聲了﹗
見對面馬路古色古香建築上面有間開哂窗既餐廳,走上去Happy Hour先﹗



地點在新馬路,Shisha Cafe,有水煙食架﹗



窗邊位置很好,可一覽新路的繁華盛世,真係旺過旺角﹗



水煙我地就無咩興趣喇,不過只係Rs 222($22),如有興趣玩下既其實試得過,平香港十幾倍仲要咩味都有﹗

記得上年在土耳其吃都要$40左右,尼泊爾這兒很便宜呢﹗




最後一天,酒精是絕對,一人隊左三杯生啤﹗

大家談談這次旅程的感覺,本來出發前也很擔心這比較落後的地方會不會有危險。
但事實上不少尼泊爾人也很Nice,也許因為窮困關係,當地人笑容比較少,沒有歐洲人的熱情,卻有份純樸無華的熱心,相處下你會覺得他們就是熱愛簡單的生活﹗

知足常樂,這也許就是我們應該學習的地方呢﹗

絕對值得一到的地方,推薦﹗
飲完酒飽飽地,搭的士回酒店坐番陣,執一執行李,之後落Thamel四圍行下睇下有咩手信買﹗



八點的Thamel,天還未黑﹗
提提大家就在酒店前兩個街口有間書店,可以買郵票及代寄出明信片,那書店內的英文小說更比香港平一半,食家掃了幾本呢﹗



好老實講尼泊爾無咩好買,尼泊爾風的首飾其實女人街大把,到處逛逛找晚餐﹗

行經唔記得邊間酒吧下面,有人在我地耳邊說:"大麻﹗大麻﹗" ,我地當然一笑置之,但我估外國遊客有很多都好此道﹗



吃了十幾廿餐西餐,是時候轉轉口味,我們今晚吃日本菜﹗



間野叫做OFUKURO NO AJI,我都講唔到俾你聽在那兒﹗但Ruby的書是有介紹的﹗



店內食物由日本人主理,現場所見亦有日本顧客呢﹗



環境光鮮,坐得舒服,服務員亦醒目,我地當然又係繼續隊下啤啦﹗



在窗邊影出去的招牌﹗



食家點了烏冬﹗



而我由於太掛住串燒,所以點了串燒套餐﹗



食物真係唔錯,串燒烤得恰到好處,醬汁香甜,推薦呢﹗

吃完晚飯其實只係10:00pm,但由於下午已經開始隊酒關係,已醉醉地,明天早機最怕起唔到身,故都係乖乖回酒店休息﹗結束我們的八日七夜之旅﹗




第二朝六點半就起身,落街吃完早餐後便打的去機場回香港﹗



話說入閘前有個小插曲,就係我地排隊入機場,見個電視顯示出來的航班時間竟然沒有我地兩個班機,仆街了,唔通買錯日子?

我倆開始緊張了,因如班機取消或有咩問題的話,便要流落異地,身上錢又洗鬼哂,唔通瞓街?



真係唔屌都唔得,入到閘問職員佢地話打漏咗,仆街啦,呢尐都有得錯,真係嚇死人﹗



有驚無險,當然順利排隊去候機。



這亦是我倆最後一張照片,真真正正完成我們的2012尼泊爾八日七夜歷險之旅﹗

打這長長的遊記前,其實都知唔會有太多人有興趣去尼泊爾,但為了為我倆留下美好的回憶,也堅持把她完成﹗

希望呢篇遊記內的資料對有興趣到尼泊爾的網友有用,如果網友們對尼泊爾自由行有咩問題,我地兩個都歡迎與大家分享,希望你們也有個奇妙的旅程﹗(全文完)

我的尼泊爾facebook相簿:
https://www.facebook.com/media/set/?set=a.10150...75&type=3&l=1789c53bd4

我的網址: http://hk.myblog.yahoo.com/smallsmallsmalllin
Facebook齊齊飲飲食食: facebook.com/smallsmalllin
我的美食地圖: http://smallsmalllin.openrice.com/
我的飲食微博: http://t.sina.com.cn/smallsmalllin
3
回覆時引用此篇文章
i700623 的頭像
i700623 i700623 目前離線 i700623 已通過手機驗證. 門號所屬國家:Taiwan
客棧之光
#12
文章: 568
性別: 男生
感謝: 142次/101篇
註冊日期: 2009-10-22
舊 回覆: 尼泊爾八日七夜登山體驗之旅 - 2012-08-15, 10:35
感謝分享
不過可以盡量少用香港話嗎??
建議你多用普通話表達.
回覆時引用此篇文章
小努303 小努303 目前離線
客棧之光
#13
文章: 452
性別: 秘密
感謝: 232次/137篇
註冊日期: 2010-12-07
舊 回覆: 尼泊爾八日七夜登山體驗之旅 - 2012-08-15, 10:49
很詳實的遊記
但也贊同樓上說的 因為我看的有點小辛苦
回覆時引用此篇文章
shengjenno1 shengjenno1 目前離線 shengjenno1 已通過手機驗證. 門號所屬國家:Taiwan
客棧之光
#14
文章: 620
性別: 男生
感謝: 337次/189篇
註冊日期: 2007-06-04
舊 回覆: 尼泊爾八日七夜登山體驗之旅 - 2012-08-15, 13:30
謝謝這位朋友的分享。
我也蠻推薦Ruby的書。
不過我也看不太懂你的文字敘述。
回覆時引用此篇文章
沁藍 沁藍 目前離線
背包客
#15
文章: 6
性別: 男生
感謝: 0次/0篇
註冊日期: 2012-04-18
舊 回覆: 尼泊爾八日七夜登山體驗之旅 - 2012-08-15, 18:12
超棒的文章
謝謝分享
回覆時引用此篇文章
回覆   發表新主題

主題分類清單
遊記行程交通住宿景點購物飲食
金錢證件其他全部
主題工具
論壇跳轉