背包客棧自助旅行論壇
[伊豆、箱根、富士]很多人都說登富士山不算困難,但今年7月和登山老手的父親登山時卻吃盡苦頭,大家都叫苦連天!回來後整理一些心得,寫成了三篇遊記,希望會對想...章同時刊於UBlog、 DC Fever Travel、 Blogspot 、遊牧爆谷,請各位繼續多多支持呀!!!!!!!!!!!!!
訂房比價
首頁 論壇 攻略 機票比價 訂房比價 旅遊相簿 會員相簿 景點地圖 背包幫 搜尋 今日新文章 註冊 登入論壇
回覆   發表新主題
 
主題工具
鋒加西亞 鋒加西亞 目前離線
背包客
文章: 11
#1
性別: 男生
感謝: 12次/4篇
註冊日期: 2017-05-26
舊 帶著爸爸行富士山1 - 路線、小屋及裝備選擇心得 - 2019-08-23, 23:06

很多人都說登富士山不算困難,但今年7月和登山老手的父親登山時卻吃盡苦頭,大家都叫苦連天!
回來後整理一些心得,寫成了三篇遊記,希望會對想登峰的大家有所幫助吧!

一如以往,都是習慣了用廣東話寫作,台灣的朋友抱歉啊!

如有問題可隨便pm,IG或到小子的專頁大家聊聊天呢~


=====================================



唔知邊個偉人曾經講過,「富士山難度唔高,只要做足準備,普通正常人都可以登頂!」

阿爸作為行過不少5-6000千米高山既行山老手,當然唔會覺得呢個3776米既日本no.1係咩一回事啦,聽到朋友講話正就興致勃勃話要搵機會上一上去!

大佬呀佢就嚟70古來稀啦,仲要身體有事食藥中,唔通仲放佢一個通山跑咩??

加上我地比上面果句「普通正常人都可以登頂啦~」引誘,於是家中年紀最細但又最虧既我,仲有識日文但已變胖既前運動員阿哥就頂硬上一齊同行了

講真呀我係擔心我地自己多過老豆,不過自從長大成人後都無再3仔爺行山了,上富士山又係老父既心願,就當做係一個美好既回憶啦~







好~ background講完,但係同我今個系列寫既野無關係ge!!!!!
我呢個blog經常都係比我自己自high ga la~
如果夾硬要講關係既話,就係我行完之後發現,富士山根本唔係大家口中咁易行!!!!! 如果抱住玩樂心態輕鬆行的話我可以絕對斷言你會死得好慘!
所以儘管坊間已有很多很多富士山登頂攻略 / 注意事項等等等等,我仍然想係呢度用我第一身既主觀感受寫幾隻字,希望會幫到想登山既朋友啦!


p.s.此文是寫比像我一樣最多間中爬下大浪西灣、龍蝦灣家樂徑既新手,如是行山老手可以skip,因為大量野都係娘親是女人來的~




================================




1. 登山路線選擇




第一次行富士山幾乎每個人都一定走「吉田線」,主要因素唔止係易行,最主要係沿路有大量補給點及救護站,可以話係最安全既路線 ; 缺點係步行距離長及人太多,夜晚要排隊上山,近山頂的山上小屋亦會係4-5月開放booking時被高速搶購一空。

「須走線」起點海拔會較低,到本八合目「上江戶屋」時更會同「吉田線」會合,即係第朝都係要排隊攻頂。所以除非妳想係起步段睇下樹海森林風景,否則都無咩人會揀呢條路嚟行。落山行呢條路反而多d,因為可以玩「大砂走」,垂直落山快好多! (但傳聞話好傷膝)



(須走線吉田線會合位)

「御殿場線」係步行距離最長的一段,亦無救護站,所以係最少人選擇既路線。亦因為人少,如果係行山老手唔想比人煩比人嘈的話可以揀呢條,同時落山都有大砂走~

「富士宮線」從靜岡富士宮市起點到山頂的距離最近,係初心者既次選,但上下山都係同一條路有d悶,仲要閃避下山人群,要注意






其實仲有條路叫「富士山3776線」,意思就係由海拔零米開波....... 新手既唔好搵條命嚟玩啦........
而我今次係行吉田線的,所以以下內容亦以此為主,至於路線的真實情況,下兩篇會講到的......


2. 揀山上小屋住宿

首先睇左呢幅網上圖片先~





八合目以下既小屋真係諗都唔使諗!
雖然話富士山被謝靈運分為一至十合目共10份 (what!?),但每一份唔係均等的!
由吉田五合目到七合目大約只要2-3小時,但七合目至八合目卻需約兩小時,八合見至八合五勺更係最快都要個半鐘!
假如住七合目的山中小屋,會距離山頂仲有差不多5-6小時路程,仲未計休息時間wor!
日出大約係早上4點半,即係約晚上10點幾就要於零度氣溫以下起身出發行多成公里上山? 咪玩啦!
但就算係剛到八合目的「太子館」、「蓬萊館」亦距離山頂非常遠!










(七合目第一間山中小屋「七合目トモエ館」)




















(八合目第一間山中小屋「太子館」)


因為多數小屋距離山頂都好遠,所以好多人會選擇係體力充沛既第一日爆到盡上到最高,that’s why「吉田線」最高既「御來光館」會係開始預約當日比人谷爆左個網上booking system,even連電話都打唔通!
概念是正確的~
不過有個問題大家要注意,位於八合五勺的「御來光館」其實係非常非常高的!
距離山頂十合目慢行都只需兩小時ja wor!
所以如果一日直爆上去,有好大機會你未到御來光館就已經見到另一個世界既御來光!
我爸爸就係因為到達小屋前體力不支幾乎跌左落山! 嚇到我同阿哥魂飛魄散!
難為阿爸暈低後仲講笑「邊個慒佬起間屋係咁高既地方呀~」




原文載於: 背包客棧自助旅行論壇 https://www.backpackers.com.tw/forum/showthread.php?t=10326920






(第二朝見到大量人上到嚟御來光館已經得返半條人命)



所以如果係好似我地咁體力不佳,真心建議揀一間矮少少又唔太矮既山中小屋,早d好好休息先再出發!
個人意見嚟講,山小屋at least係「元祖室」以上,因為就路上所見,9成行山人士行到元祖室時個元神都開始歸祖ga la
最好當然係住「本八合目トモエ館」、「上江戶屋」or「富士山ホテル」
唔好以為呢兩間同御來光館「都係差廿分鐘無咩分別je~」,廿分鐘係指你正常狀態,未計行左一日既疲態同高山反應呢!
當然啦以上呢幾間都係易full booking,如果真係無,有前輩都推薦「白雲莊」的~




(元祖室)






(好大間的富士山ホテル)











(八合目第3間的白雲莊)


==============


吉田線小屋旅館綜合website,可以係度一次過睇哂邊間屋有位~
http://www.mtfuji.jpn.org/index.htm


==============


3. 裝備
防曬帽及一眾防曬用品好重要好重要好重要!!!!!
我上山下山時都天陰清涼有風好舒服,到行完就發現變左隻燒豬! 而我雙手及後頸只係五合目至七合目先有裸露出嚟........
就算我阿爸戴左帽,但打緊呢篇文既moment都仲係做緊脫皮爸爸law......





(原來上到御來光館已經燶左.............)







衫褲鞋襪唔特別講啦,反正個個唔同,連國產mk女生著one piece + converse都有,我只係奇怪竟然無大媽帶「臉kini」je
我個人就推薦洋蔥式著法,最基本都要有一件可以頂到零度氣溫既輕薄外套,亦可以就住行起上嚟慶恰恰而自己調節




(人地咁樣著係正路)





(我咁樣著係唔對路~)



行山杖可以用自己的或於五合目買金剛杖~
講真呢枝棍遠比我地想像中好用,唔係純紀念品咁簡單,仲幾鬼結實tim!
注意落山時可用兩支行山杖,對腳力不佳者非常有用!














保暖手套就睇個人啦,如前輩所言勞工手套都得~
萬一好似我地咁開頭覺得唔使卻臨時發現需要,無問題~ 可以係山中小屋買到的(我係白雲莊買),只不過由100yen 3對變成300yen一對g ma........




(講真勞工手套真係好正,連防寒效果都一流!)

至於個個都話落山必備,防沙石入腳既鞋套我自己就覺得未必,只要條褲夠長cover到鞋筒又有橡筋可cool死就ok,至少我咁做真係一粒石仔都無入侵過~
當然如果閣下係著leg勁就無計啦



原文載於: 背包客棧自助旅行論壇 https://www.backpackers.com.tw/forum/showthread.php?t=10326920



至於其他detail d既行山裝備我唔講啦,個人喜好啦,反而最應該帶既係 ----------- 錢!!!!!!!
吉田線小屋乜野都買到,只係樣樣都殺到你一頸血!
300yen一隻蕉 ----- 抵!
500yen一支水 ----- 買!
600yen一個杯麵 ----- 食!
要知道係富士山上,大家都係一隻隻待宰的肥羊,仲要被宰得非常開心......
因為上到八合目開始瀕死既你唔會諗到一個「貴」字,只會覺得天寒地凍有個杯麵好幸福......











最後有一樣食物我覺得係必需既 ------ 鹽糖!
呢家野我上山前大鄉里聽都未聽過,係久居日本既姨丈行行下突然係百寶袋囉出嚟
開頭仲諗乜料呀咸既糖?我份人仲唔夠咸咩........wei原來保礦力味ge??固體既保礦力???
就好似廣告所講呢種鹽糖可以補充身體水份鹽份同電解質,令人回復體力防止中暑
需知道唔係好似銀魂咁度度都有保礦力賣,行到攰整返粒真係覺得醒神唔少,係今次完成行程既一大功臣!
日本各大便利店超市及驚安之殿堂有售~















前言講住咁多,下篇正式講下我地既上山經過!
唉........囉命呢.............

=================================

相關文章 :

東京雜記1 - VR館簡短Game評及小貼士

東京雜記2 - 東京千本鳥居+爆料天丼

東京雜記3 - 池袋的災害體驗

東京雜記4 - 日本第一炸豬扒

東京雜記5 - 那夜凌晨,我坐上了東京開往大阪的巴士

東京雜記6 - 蠔大大小店,性價比超掂

=================================

IG果邊間中會有d和Blog及fb page不一樣的相片和story,大家有興趣既去follow下支持下啦~

(其實係人數實在太少.........支持下啦........T_T)

Instagram : https://www.instagram.com/fung_garcia/

Email : funggarcia@gmail.com

My Facebook Page : www.facebook.com/Garcia.in.Germany

Medium : https://medium.com/@funggarcia




另外文章同時刊於UBlogDC Fever TravelBlogspot遊牧爆谷,請各位繼續多多支持呀!!!!!!!!!!!!!
被閱讀197次
回覆時引用此篇文章
回覆   發表新主題



主題分類清單
遊記行程交通住宿景點購物飲食
金錢證件其他全部
主題工具
論壇跳轉
主題工具