「長い長いさんぽ」須藤真澄　ＢＥＡＭ　ＣＯＭＩＸ

書的廣告 http://www.enterbrain.co.jp/jp/p_pickup/2006/yuzu/
日文介紹 http://ore.to/~gekka/2006/01/20060129_232700.php

Chit 本冊的副標是「ゆずとの最後の日」
作者須藤真澄是阮真 kah意的作者，因為伊的冊台灣無teh出，所以去日本的時，我攏會特別注意伊的冊。
Ti7 Comicket的隔轉工，我ti7 秋葉原的舊冊店看著 chit本「長い長いさんぽ」。
須藤真澄是一位真有名的少女漫畫家，雖然伊目前的作品是 ham3進前有夠流行的「英國戀物語-艾瑪」仝一本雜誌連載，
m7-koh ti7秋葉原 chit個ACG聖地，須藤真澄的冊我是頭一擺看著。
Teh起來掀的時，頭前是講伊飼的貓 柚子/ゆず 12歲到16歲的生活趣味代誌。看 kah chia，因為真kah意須藤真澄趣味的故事，所以 tioh隨 ka7 伊買起來。
轉去旅舍的時，因為抑有買誠濟本冊，想講 chit本 kah趣味，留 ti7明早坐電車的時 chiah來看好啊。
結果，早知影 tioh ti7旅舍 ka7 chit本冊看了，就 boe7 hiah-ni見笑啊～

☆寫這篇文章還是一邊寫一邊哭…所以只有先哭出來台語版…

為啥按呢講…
因為這本冊的後壁段，是完全無仝款的氣味。
柚子16歲的時，ti7須藤真澄出國的上尾一工死去啊。續落來的故事tioh是須藤真澄和 in翁兩個人為柚仔所做的身後事，一項一項畫落來。
in 先是哭一暝了後，聯絡著火化場，替柚子做火化的準備，行路去火化場。火化了後，兩個人 koh重新撿骨，ka7一寡仔骨灰 ia7 ti7厝的園仔內底。in為柚子做一個古錐的台仔，kng3柚子的骨灰和相片，hou7柚子ti7 in的厝內繼續和爸爸媽媽做伙生活。
雖然上尾須藤真澄 in有 koh飼兩隻 ham3柚子同花草的貓，m7-koh柚子永遠是須藤真澄的"散步王國"內底的國王。

長長的散步，是因為 beh chhoa7柚子去火化的時，因為 m7-敢坐電車，所以用行的，行beh三點鐘 chiah到火化場。來回的路頭雖然誠 hng7，對柚子的思念，可能 koh khah 長。

阮tau7有真濟貓出入，真正是做「寵物」teh飼的，ka-na「女王喵」一隻nia7。tui3伊二個月大的時，伊tioh已經是歸家伙仔的"愛貓"。
七年來，m7-na 阮 chia出外的囝仔轉來，ka7父母請安了後，隨tioh問：「貓咧？」ham3逐工 toa3 厝的老爸仔，一下班第一句 ma是問：「貓咧？」
今年七月初九，ti7阮 beh去環島的頭前一工，我 chiah知影女王喵重病。hit 工，我 ham3 beh去做兵的小弟仔兩個人 tu3好有轉去厝-lih，陪伊這段上尾的時間。
隔轉工下晡，阮人hou7土石流留 ti7三峽的滿月圓森林遊樂區的時，kha3電話轉去問，知影女王喵已經"轉去"啊的時，心肝雖然有小可艱苦，m7-koh tioh按呢過啊。
環島十一工順利結束，koh去澎湖、日月潭，上尾到東京。
看著 chit本冊的時，情緒歸個攏 hou7伊 gia5起來…
ti7 半點鐘的電車頂頭，我一旁看一旁流目屎，哭 tam5四張衛生紙。害車頂 hia的日本人驚著，想講是發生啥物代誌。
ti7轉來台灣的飛機頂頭，我 ma是一旁看須藤真澄為柚子做的代誌，一旁流目屎，ka7我一條新的手巾仔哭 khah歸個攏 tam3去啊～
寵物的壽命普通來講，上濟是10～15年，送寵物轉去是誠濟人的經驗。
須藤真澄的這本冊，伊用漫畫的方式，一格一格記錄落來 in實際的代誌，ma記錄了愛寵物的精神，hou7阮 chia有仝款經驗ham3心情的人真感動。
寫 kah chia 又擱想 beh流目屎啊…chit本冊已經買轉來三個月啊，我猶原是一旁看，一旁哭…