Ti7 東京COMIKET 會場，我體會著啥物叫做「團體的力量」。(參加2006.08.11-13 COMIKET 70活動感想)

在東京CMIKET會場，我體會到什麼叫做「團體的力量」。

☆★☆抱歉，本文還沒有寫國語版的，如果台語文閱讀很吃力的人，就跳過本文吧！有時候情緒過了，很難再寫一次另一個語言內容能一模一樣的文章。就等我情緒再提起來時再補寫吧！

Ti7 COMIKET 會場，我體會著啥物叫「團體的力量」。
進前 ti7台灣時的經驗內底，我參加過上大的「團體」是「牽手護台灣」，第二大的是ti7台北參加的「台灣正名」活動。Chit 擺COMIKET 70，三工內底攏總有43萬人次參加，第二工上少，11萬人次，第三工上濟，18萬人次。比起頭前兩個活動，參加的人卡少，m7-koh，感覺真深…
COMIKET活動期間，逐工早起差不多四五點，tioh已經有人開始 ti7活動的展覽館頭前排隊。到活動正式開始的十點進前，ui3八百公尺外的電車車站「國際展示場」頭前開始，到展覽館的正頭前，另外一個方向，ui3 國際牌「Panasonic展示中心」頭前往台場上有名的「摩天輪」的hit條「潮風大橋」頂頭，攏總排滿beh 入去參觀的人。第三工的時，因為我差不多十點 chiah beh去排隊，我人已經排到潮風大橋頂頭，上尾，到十一點外chiah 輪著我入場。我有 sioh-khoa7-a2算一下，hit 工十點的時，上少有十萬人ti7 COMIKET會場外口排隊。Chiah 呢濟人咧排隊，m7-na 逐家攏照順序排做伙，有的人看冊，有的人研究會場目錄，有的人sng2手機仔，有的人ham3人開講，koh 有打扮做「LOLITA」款的查某囝仔 teh補妝、整理 Lace…總是，無人大聲吵鬧。
這種排隊的場面ham3 今年寒天去排傑尼斯商店的時仝款，無仝的是，傑尼斯商店外口，上濟是一、二百人，Ti7 COMIKET會場，排一大排上少有五六千人，攏總有七八萬人到十外萬人做伙排隊，場面完全無仝款。
Ti7 chit 個大團體內底，m7-敢講日本人tioh攏外守法，三不五時 ma是會使看著有人插隊。M7-koh 我上欣賞的是，ti7排隊的人走去頭前，阮後壁的人接過來 in的位的時，誠少看著塗腳是有 pun3-so3的，若是有，ti7我beh去 kioh的時，COMIKET的工作人員已經衝過來kioh去啊…Che實在是傷 hamh啊…
所以咧，我tioh tiam3-tiam3-a2 排ti7 chit個大團體內底，假影家己這時變做是日本人，目睭三不五時 khe3-leh0，想講若是我飛ti7 chit條頭頂頭，看著的是啥物款的情形～～
最近台灣流行「動員」，ti7電視頂頭 ma會使看著比 COMIKET會場khah濟的人為著家己的政治意圖集集做伙。我m7-敢希望台灣有hiah濟人排隊去看漫畫展， ka-na希望有hiah濟人打拼為台灣koh khah好。